Menntun er leið til farsældar
Góðir leik- og grunnskólar gegna þar lykilhlutverki. Samfylkingin leggur áherslu á að Kópavogsbær búi vel að fjölskyldufólki og að útgjöldum barnafjölskyldna vegna skóla og íþrótta- og tómstundastarfs verði haldið í lágmarki. Heilbrigði og vellíðan barna skal vera í fyrirrúmi. Tryggja verður að sérhvert barn og unglingur geti notið þess sem boðið er upp á í tómstundastarfi, óháð efnahag foreldra.
Skólamál eru viðamesti málaflokkur sveitarfélagsins. Mikilvægt er að vel sé haldið utan um hann og að þeim fjármunum sem til hans fara sé útdeilt af sanngirni og með hag barna og unglinga að leiðarljósi.
Samfylkingin vill stuðla að því að leikskólar geti tekið við börnum við 12 mánaða aldur og að þeir veiti þeim gott atlæti og fjölbreytta menntun í örvandi umhverfi.
Tryggja þarf að viðhaldi grunn- og leikskólabygginga sé sinnt og að skólar séu mannaðir fagmenntuðu fólki. Núverandi meirihluti hefur ekki sett af stað byggingu nýs leikskóla síðastliðin átta ár þrátt fyrir mikla fjölgun barna á leikskólaaldri. Enn frekari fjölgun er í vændum vegna aukinna barneigna undanfarin ár. Nauðsynlegt er að ráðast í uppbyggingu innviða í leik- og grunnskólum og sinna viðhaldi skólamannvirkja með það í huga að bæta starfsaðstæður starfsmanna og barna. Við þurfum að mæta kröfum kennara á öllum stigum með bættu vinnuumhverfi og hvata til endurmenntunar.
Uppfyllum ólíkar þarfir barna
Í Kópavogi þarf að bjóða upp á fjölbreytta þjónustu við nemendur með ólíkar þarfir og tryggja að fagfólk starfi innan skólakerfisins í bænum. Auka þarf stuðning við þá nemendur sem á honum þurfa að halda, en jafnframt þarf markvisst að sinna þeim nemendum sem skara fram úr og börnum með fjölbreyttan tungumála- og menningarbakgrunn. Bjóða þarf upp á heimanámsaðstoð við alla grunnskóla.
Leita skal leiða til að bjóða yngstu árgöngum grunnskólans upp á sérstakt úrræði í samvinnu grunnskóla, frístundar, menningarstofnana og íþrótta- og tómstundafélaga yfir sumartímann.
Stuðla skal að aukinni þátttöku barna með fjölbreyttan tungumála- og menningarbakgrunn í íþrótta- og tómstundastarfi, m.a. með því að bjóða þeim upp á þriggja mánaða frítt reynslutímabil.
Nýlegar rannsóknir sýna að ekki líður öllum börnum í Kópavogi vel í skólanum. Mikilvægt er að auka þjónustu félagsráðgjafa, þroskaþjálfa og sálfræðinga í skólum Kópavogs og beita snemmtækri íhlutun þegar það á við og koma þannig í veg fyrir að vandamál barna og unglinga aukist og verði að stærra vandamáli síðar á ævinni.
Undirbúum börnin okkar fyrir áskoranir framtíðar
Góð menntun er undirstaða velgengni. Vel menntaðir einstaklingar með góð tök á íslensku og öðrum tungumálum sem eru færir í að beita gagnrýninni hugsun og leysa verkefni á skapandi hátt eru betur í stakk búnir að takast á við áskoranir í síbreytilegum og hnattvæddum heimi.
Rannsóknir sýna að skapandi greinar og hugvitsvinna muni á komandi árum verða ein mikilvægasta þekking sem barn getur búið að. Við viljum stuðla að því að auka áherslu á verk-, tækni- og listgreinar, þroska umhverfisvitund barna og samþætta skapandi greinar við almennt nám. Gera ætti forritun að skyldunámi í grunnskóla.
Einnig viljum við efla nýsköpun og frumkvöðlafræðslu í skólum bæjarins þannig að við getum búið börnin okkar sem best undir áskoranir stöðugra breytinga og þróunar í tækninýjungum.
Á næsta kjörtímabili viljum við:
Fjölga leikskólum og brúa bilið - leikskólapláss verði til staðar fyrir börn við 12 mánaða aldur.
Bæta vinnuumhverfi í leikskólum í samræmi við vinnuumhverfi grunnskóla og tryggja leikskólum sjálfstæðan fjárhag. *
Hafa ókeypis leikskóladvöl til hádegis fyrir öll börn.
Endurskoða barngildisviðmið í leikskólum bæjarins.
Ráðast í uppbyggingu innviða leik- og grunnskóla Kópavogsbæjar.
Tryggja sumarfrístund fyrir öll börn.
Bæta starfsaðstæður kennara og bæta sérfræðiaðstoð í kennslu.
Fá félagsráðgjafa og/eða sálfræðinga í alla grunnskóla.
Minni nemendahópa í skólum og fleiri kennara.
Tryggja að hér þrífist og dafni öflug verk-, forritunar- og listkennsla í öllum skólum.
Tryggja að nemendur fái þjálfun í upplýsinga-, miðla- og tæknilæsi.
Auka stuðning við snemmtæka íhlutun og geðrækt.
Bæta læsi og málskilning.